අමරපුර නිකායෙහි, අග්ගමහාපණ්ඩිත විද්‍යා විශාරද මහා මහෝපාධ්‍යාය මඩිහේ පඤ්ඤාසීහ මහානායක ස්ථවිරපාදයාණෝ ධර්මවිජය පදනමේ නිර්මාතෘවරයාණෝ වූහ. කෙටියෙන් කියතොත් ධර්මවිජය පදනම වෙනසක් සහිත සංවිධානයකි. එය හුදෙක් බෞද්ධ සංවිධානයක් නොවන අතර හුදු සමාජ සංවිධානයක් ද නොවේ.

“මිනිහාත් හදා ගනිමින් රටත් හදා ගනිමු” යන උදාර සංකල්පයෙන් අග්ගමහා පණ්ඩිත අතිපූජ්‍ය මඩිහේ පඤ්ඤාසීහ මහා නා හිමියන් 1977 නොවැම්බර් 15 දින ආරම්භ කරන ලද ධර්මවිජය පදනම 1979 අංක 62 දරණ පාර්ලිමේන්තු පනතින් සංස්ථාගත කරන ලදී. “සමවායො එව සාධු”, “සමගිය ම යහපති” යන්න අප පදනමේ තේමා පාඨය යි.

පුර්වෝක්ත අරමුණින් ආර්ථික, අධ්‍යාපන, සෞඛ්‍ය, සදාචාර යන සතරාකාර දියුණුව ඇති කර පන්සිල් හා සහජීවනය අගයන පූර්ණ සංවර්ධිත සමාජයක් බිහි කිරීමේ මෙහෙවර ප්‍රකාශය ගරු කරමින්, අප පදනම පසුගිය වසර 30 තුළ දීප ව්‍යාප්ත ස්වේච්ජාවෙන්, විශ්වාසනීයත්වය හා විනිවිදභාවය සුරැකෙන පරිදි ශ්‍රි ලාංකික සමාජයට සේවය කර ඇත.